عجبي علي سيد أمره بإيد خدامه

من ديوان الموال المصري

1
مسرف ف إيده الجنيه بمقام تعريفه(1)
غاوي المظاهر وعايز الناس تعريفه(2)
بكره ها يحتاج ولا يلقاش تعريفه
المعدن اللي اشتراه واهو عجبه تلميعه
صفيح مطلي عجبه يغر تلميعه
ولما ظهر الصدا ما نفعش تلميع
قام راح يبيعه ما جابش قرش تعريفه
2
يا للي غرورك كاسات الوهم سبها لك (3)
واحلوِّت المعصيه وإبليس سبها لك (4)
الحلوه خدها لكين الوحشه سبها لك
حتي كلامك خداع أصبح كدا وكدا
صرفت أموال وبتبعزق كدا وكدا
أبوك جمعها وحوشها كدا وكدا
وإذا كان يعرف كدا ما كان سبها لك
3
عويل شبع بعد جوعه والفلوس نفخوه (5)
من سو بخته لقي شِلَّه معاه نفخوه
اتبرا م الأهل وأكتر من كدا نفخوه (6)
بيلف ويدور حوالين البلد بارم (7)
عامل لي تعلب وديله من وراه بارم (8)
تملي منفوش ف نفسه والهدوم بارم
وبيمشي وارم تقولشي الجزارين نفخوه
4
يا للي تبيع الشرف هو الشرف ببلاش
أملك أهو خاب وجريك انتهي ببلاش
واللي اشتراك بالغلا بعته رخيص ببلاش
صبحت مشغول بشيْ لم كان علي وردك (9)
خلاص فقدت الأمل والهم في وردك (10)
الشوك أهو جرحك لما أنقطف وردك (11)
رخصت عرضك وبعته للعويل ببلاش
5
اللي يهمَّل حمامته م البروج فرَّط (12)
وتلاقي شجرُه دِبِل منه التمر فرَّط (13)
مادام لسانه تملِّي بالكلام فرَّط
ما هو أنغر لما ظروفه جت معاه عاطيه
وخلا ايده دايما ف الفساد عاطيه
ملوش كرامه ومهما الدنيا له عاطيه
أبو نفس واطيه ف عرضه بالجنيه فرط
الست لو متعبه تتعب بنيتها (14)
يطول لسانها ولا تخلف بنيتها
بتدرس المكر وتعلم بنيتها (15)
تتعب راجلها قوي وتصبحه ف الضيق (16)
وتسوق دلالها عليه وتبهدله ف الضيق
تعيش معاه ف الوسع وتهمله ف الضيق (17)
وأن أسست شئ ما تنهدش بنيتها (18)
7
عمال أحايل ف بختي كتير وبسايس (19)
والجسم فيه نار من الأفكار وبسايس
والتوب علي صبح هرابيد وبسايس (20)
علشان كحيله وذلت والهوي سبعاه (21)
مشيت ف غير وعيها وطرق العناد سبعاه (22)
السرع سيب لها حتي الشيطان سبعاه (23)
خيالها سيباه وشوف بتركب السايس
8
الحب خلا العجوز للجواز حنت(24)
نسيت كبر سنها واهي للشباب حنت
خابت وعابت وللشيْ الرخيص حنت
داست ف أرض الهوي ما خافتش م الدوسه (25)
نظرها شيش بيش ولا بتحقش الدوسه (26)
غنت علي حظها واهي لعبت الدوسه (27)
ولبست هدوم العروسه وآهي للايدين حنت (28)
9
عجبي علي سيد أمره بإيد خدامه
لما انحرف انتلف والهم خدامه (29)
ومهرته رمرمت وركبها خدامه
تاجر تجاره خسر فيها وسوقها بار (30)
وزرعته هيفت وغيطه بار (31)
مشي يلطش ومش عارف لنفسه بار (32)
ولما الزمان جار بقي خدام خدامه
10
يا غاوي الحب جالك إيه وشنابك (33)
مشيت ورا ناس سقوك الكاس وشنابك
عامل لي حبيب وكلك عيب وشنابك
آدي إنت طبيت وفي اللي وقعوك تنصاد
هي بحور المُحبه يا غشيم تنصاد
عامل لي صيَّاد وانت بفتلتين تنصاد
وِلِوَت خزامك يا واد البنت وشنابك (34)
1 وحدة نقود لم يعد لها استعمال 2-تعرفه
3-صبها لك 4-تركها لك
5- أي جعلته متكبراً 6- مدمجة ( نفي .... أخوه )
7- بمعني اللف والدوران 8- ملفوف
9-أي لم يرد بذهنك 10- فيما سيأتي
11-نسبة إلي الورد 12- فرت من الفرار
13- تساقط 14- من النية
15- ابنتها 16 - الضيق
17-الفقر 18- بنايتها
19-أهادن 20- قطع صغيرة
21- سبعة (الرقم ) 22- سبعها
23- مدمجة ( ساب ... عاهة )
24- أي حنت للزواج
25- فتعني المشي
26- الدوسه : رقم معروف في لعبة الطاولة وهو فارسي
27- لعبة الدوسة 28-من الحناء ، وتعني التحنية
29- مدمجة ( أخذ ...دمه ) 30-بار : كسد
31-لا ينبت 32- بئر
33- مدمجة (إيش نابك)، أي ما الذي نابك
34- شنابك ، نسبة إلي الشنب ، أي الشارب