والله وشبت يا عبد الرُّحمان .. عجّزت يا واد ؟ مُسْرَعْ؟ ميتي وكيف؟ عاد اللي يعجّز في بلاده غير اللي يعجز ضيف !! هلكوك النسوان؟ شفتك مرة في التلفزيون ومرة .. وروني صورتك في الجورنان قلت : كبر عبد الرحمان!! أمال انا علي كده مت بقي لي ميت حول!! والله خايفة يا وليدي القعدة لتطول مات الشيخ محمود وماتت فاطنة ابْ قنديل واتباع كرم ابْ غبّان وانا لسة حية.. وباين حاحيا كمان وكمان عشت كتير عشت لحد ماشفتك عجّزت يا عبد الرحمان وقالولي قال خَلَّفت وانت عجوز خلَّفت يا اخوي؟ وبنات..!!؟ أمال كنت بتعمل إيه طيلة العمر اللي فات؟ دلوقت مافقت؟ وجايبهم دِلْوكْ تعمل بيهم إيه؟ علي كلٍّ.. أهي ريحة من ريحتك ع الأرض يونسُّوا بعض ماشي يا عبد الرحمان أهو عشنا وطلنا منك بصة وشمة دلوك بس ما فكرت ف يامنة وقلت: يا عمة؟ حبيبي انت يا عبد الرحمان والله حبيبي .. وتتحب علي قد ماسارقاك الغربة لكن ليك قلب مش زي ولاد الكلب اللي نسيونا زمان حلوة مرتك وعويْلاتك والاّ شبهنا..؟ سميتهم إيه؟ قالولي : آية ونور ماعارفشي تجيب لك حتة واد؟ والاّ أقولك : يعني اللي جبناهم.. نفعونا في الدنيا بإيه؟ غيرشي الانسان مغرور !! ولسه يامنة حاتعيش وحاتلبس لمّا جايب لي قطيفة وكستور؟ كنت اديتهمني فلوس اشتري للركبه دهان آ..با..ي ما مجلّع قوي يا عبد الرحمان.. طب ده انا ليّا ستّ سنين مزروعة في ظهر الباب لم طلّوا علينا أحبة ولا أغراب.. خليهم.. ينفعوا أعملهم أكفان..!! كرمش وشي فاكر يامنة وفاكر الوش؟ إوعي تصدقها الدنيا.. غش ف غش..!! إذا جاك الموت يا وليدي موت علي طول.. اللي اتخطفوا فضلوا أحباب صاحيين في القلب كإن ماحدش غاب.. واللي ماتوا حتة حتة ونشفوا وهم حيين.. حتي سلامو عليكم مش بتعدي من بره الأعتاب أول مايجيك الموت .. افتح.. أو ماينادي عليك .. إجلح.. إنت الكسبان. إوعي تحسبها حساب..!!بلا واد .. بلا بت.. ده زمن يوم مايصدق .. كداب..!! سيبها لهم بالحال والمال وانفد إوعي تبص وراك.. الورث تراب وحيطان الأيام طين وعيالك بيك مش بيك عايشين..!! يو.....ه يا رمان.. مشوار طولان واللي يطوِّله يوم عن يومه يا حبيبي .. حمار الدوا عاوزاه لوجيعة الركبة مش لطوالة العمر. إوعي تصدق ألوانها صفر وحمر. مش كنت جميلة يا واد؟ مش كنت وكنت وجَدَعَة تخاف مني الرجال ..؟ لكن فين شفتوني ..؟ كنتوا عيال.!! بناتي رضية ونجية ماتوا وراحوا وأنا اللي قعدت.. طيِّب يا زمان..!! إوعي تعيش يوم واحد بعد عيالك إوعي يا عبد الرحمان.. في الدنيا أوجاع وهموم أشكال والوان.. الناس مابتعرفهاش.. أوعرهم لو حتعيش بعد عيالك ماتموت.. ساعتها بس .. حاتعرف إيه هوّه الموت..!! أول مايجي لك .. نط لسه بتحكي لهم بحري حكاية فطنة وحراجي القط..؟ آ..باي ماكنت شقي وعفريت من دون كل الولدات.. كنت مخالف.. برّاوي. وكنت مخبي في عينيك السحراوي تمللي حاجات.. زي الحداية .. تخوي ع الحاجة .. وتطير .. من صغرك بضوافر واعرة .. ومناقير.. بس ماكنتش كداب.. وآديني استنيت في الدنيا لما شعرك شاب..!! قِدِم البيت.. اتهدت قبله بيوت وبيوت.. وأصيل هوه.. مستنيني لما أموت..!! حاتيجي العيد الجاي؟ واذا جيت حاتجيني لجاي؟ وحتشرب مع يامنة الشاي ..؟ حاجي ياعمة وجيت.. لالقيت يامنة ولا البيت