1 - يا صديق الوردة حالة عشق انت جوايا (تتيم خاص) ومنطقه بكر في دمايا وغير شعر طفولة نبضك ما يلمسهاش. تعرفني أو ما تعرفنيش مش هي دي القصة ليك فيا وأنا ليا فيك ما للعشق في دمانا ليك فيا ما للغنا ليك فيا ما للحنين للدمع للغصة. مخنوقة ليه مش عارفه أو.. عارفه وتقيله يا ما الثواني عليا وانا عارفه ليه ثقيله.. لكني ما اعرفشي! هافف عليا انت حد البكا كدا ليه وزايرني حزني الغريب بقاله كام ليله.. غريب مسايا يا صاحبي اللي ما عرفنيش كئيب.. شاحب لا حبيب رادد روحي ف أسي الوحده كما العادة، ولا صاحب. والقاهرة القاهراني، القاهرة السارقة عمري أو من عمري سارقاني مرسومة ورا غيم دموعي من غياب وحنين. أنا قمت م النوم اللي أنا ما نمتوش حزينه أوي ومليانه ب»ساعات أقوم م النوم حزين« حسيتني عايزه اكتبلك قلت اكتبلك. حسيتني عايزه أقولك باحبك أوي قلت أقولها ببساطة: باحبك كتير بابعتها ويا شواشي وويا جدور ومع غيمه ومع نجمه وورده »بمبي« بتقولك جناح طاير في سما حرية بيلاحقك ودمعة عشق وشجرة سيسبان شبهك ونيل شاربك ونخله نفسها تطولك ومع قلبي كتير بابعتها ما بتوصلشي يا صاحبي؟ 2 - يا فاتني شامم روايح الربيع؟ أهه!.. هاله طعمك ف ريحة شمسه رعشة دموع ورده وضحكته الطاله. طعمك في أمسياته في صهده.. في امتحاناته في كوبايات شاي المذاكرة البايتة ع السفره في دمعه تحت المخده في ضجره، خنقه.. ساعاته. في دقدقات قلبك الطايره من كاسيت مفتوح علي الآخر في شباك (ولد ورده) ورايحه قاصده شباك (ورده بنت) طعمك في شجي نواصيه وف همس عطفاته في فرح زينة شوارعه.. ف ضي قناديل حاراته. طعمك سمر قهاويه وجع انتظار لياليه أحلام ولاده وبناته. يا نهر من كيميا الربيع نابع مين اللي جي بمين كل مره: انت اللي جاي بالربيع ولا الربيع اللي بوردة روحك راجع؟ يا شمس عمر الغنا الجميل يا صباه يا نوارات طرحه يا طفولة اللفظه البريئه الجريئه يا طفل ملس بكفه علي شعر حصان اللغه الجامح وطعمه سكر شوقه وفتونه سلم له روحه بطبطباته الدافيه وبهدهداته الرقيقة. يا فاتني وباحسك في حسد قصيدة بعيدة لقرب أغنية، في حنين رواية ستميت صفحه لإيحاء إيجاز مدهش لرباعيه، شوق العباية الصوف لتي شيرت حريه. مقاطع من قصيدة مطولة