كشفت الفنانة ياسمين عبدالعزيز، كواليس ظروف صعبة مرت عليها، وكيف أصبحت أقوى بعد مرورها بالعديد من الأزمات والصعوبات. وقالت خلال حلقتها مع الإعلامية إسعاد يونس في «صاحبة السعادة» بالجزء الثاني منها: «أنا طول الوقت بتحارب من تحت لتحت، وعندي أعداء، ومش فكرة المشاكل مع الرجالة على البطولة بس أو على شباك التذاكر، ولكن أنا كمان بتأذي أذية غريبة». وأكملت ياسمين عبدالعزيز: «وبحب أوي يبقا عندي أعداء وحرب وأذية في شغلي، وبتغذى على الحاجات دي لأنها بتخليني أنجح، ومبحبش أتفرج على نفسي، وبفضل أطلع عيوب كتير في نفسي». وتحدثت ياسمين عن فكرة تحقيقها الإيرادات في شباك التذاكر، وكيف تبذل مجهود دائمًا كي تظل في الصدارة، مضيفةً: «وأنا كنت بحارب كتير جدًا عشان أوصل للي أنا فيه، وأوصل إني أنزل وسط الرجالة وأجيب إيرادات». وتابعت عن موقف أثار غضبها: «وفي مرة كنت بكلم منتج وقالي هو أنتي جايبة إيرادات أنتي واحدة ست، وأنا انفعلت وقولتله يعني إيه أنا واحدة ست إيه المشكلة، وكان عندي تحدي في الحاجات دي أوي، وبحب أنزل وسط الرجالة، وأحب لما يكون فيه منافسة جامدة أنزلها». وعن المواقف الصعبة التي مرت بها قالت ياسمين: «لو أبويا وأمي مكانوش أطلقوا مكانش زماني بنت قوية وبصرف على نفسي وماسكة نفسي، ولو موضوع الأزمة دا مكانش خلني أقرب من ربنا، كل واحد فينا مرّ بحاجات كتير صعبة عملت منه شخص أفضل وأقوى».
